कु. अवंती गजानन हरणे यांची ‘लेंड–ए–हँड इंडिया’ फेलोशिपसाठी निवड.

अकोला, दि.14 नोव्हेंबर आझाद नायक न्युज

जिल्हा परिषद नगर खडकी अकोला येथील पंचफुलाबाई पाटील समाजकार्य महाविद्यालयातील बी.एस.डब्ल्यू. अभ्यासक्रमाची विद्यार्थिनी आणि कर्वे समाजकार्य महाविद्यालय, पुणे येथून नुकतेच एम.एस.डब्ल्यू. पदवी प्राप्त केलेली कू. अवंती गजानन हरणे हिने उल्लेखनीय यशाची नवी भर घातली आहे. शिक्षणातील गुणवत्ता, कौशल्याधारित दृष्टीकोन आणि विद्यार्थीदशेपासून केलेल्या समाजा भिमुख कार्याचा उल्लेखनीय ठसा उमटवत तिने महाविद्यालयीन कॅम्पस मुलाखतीत प्रथम क्रमांक पटकावला. त्यानंतर प्रतिष्ठेच्या “लेंड–ए–हँड इंडिया” संस्थेच्या ‘स्किल ऑन व्हील’ फेलोशिपसाठी तिची निवड झाल्याचे संस्थेने अधिकृत पत्र देऊन कळविले आहे.

कौशल्य शिक्षणाबद्दल विद्यार्थी व शिक्षकांमध्ये जागृती निर्माण करणे, तसेच शिक्षण क्षेत्रात भारत सरकारच्या कौशल्याधारित उपक्रमांचा प्रसार करणे या उद्देशाने “लेंड–ए–हँड इंडिया” संस्था देशभरात कार्यरत आहे. हिमाचल प्रदेश समग्र शिक्षण अंतर्गत संस्थेच्या वतीने राज्यातील शाळांमध्ये विविध शिबिरे, प्रशिक्षण कार्यक्रम आणि कौशल्यवर्धन उपक्रम सातत्याने राबवले जातात. युवा पिढीला रोजगाराच्या नव्या उपलब्धी निर्माण करण्यासाठी सुरू करण्यात आलेल्या ‘स्किल ऑन व्हील’ या अभिनव उपक्रमासाठी यावर्षी कू. अवंती गजानन हरणे हिची निवड झाली आहे. अकोला जिल्ह्यातील प्रसिद्ध समाजसेवक गजानन हरणे यांची अवंती मुलगी आहे.

या निवडीमुळे विदर्भ अकोला जिल्ह्याचा तसेच संबंधित महाविद्यालयांचा गौरव वाढला असून, महाविद्यालयाचे प्राचार्य, प्राध्यापक, कर्मचारी, विद्यार्थी, तसेच विविध सामाजिक संस्था, संघटना आणि सामाजिक कार्यकर्त्यांनी कू. अवंती हरणे हिचे मनःपूर्वक अभिनंदन केले आहे. तिच्यावर शुभेच्छांचा वर्षाव होत असून, कौशल्य शिक्षण क्षेत्रातील तिच्या भावी वाटचालीसाठी सर्वत्र शुभेच्छा व्यक्त केल्या जात आहेत.