खाजगी रुग्णवाहिका वापराचा मिळणार मोबदला सुविधा कार्यान्वित; गरोदर मातांनी लाभ घ्यावा..जिल्हाधिकाऱ्यांचे आवाहन
अकोला :- आझाद नायक न्युज
गरोदर माता व नवजात बालक रुग्णांना रुग्णालयात ने-आण करण्या साठी रुग्णवाहीका उपलब्ध व्हावी याकरीता जिल्हा स्त्री रुग्णालयाव्दारे ‘बुक माय ई-व्हेईकल ॲप’ सुरु केले आहे. ही सुविधा पूर्णतः कार्यान्वित झाली असून या सुविधेचा गरजू गरोदर मातांनी लाभ घ्यावा,असे आवाहन जिल्हाधिकारी निमा अरोरा यांनी केले आहे.
जिल्ह्यातील गरोदर मातांना प्रसुती साठी येण्या करीता शासकीय रुग्णवाहिका उपलब्ध न झाल्यास खाजगी वाहन किंवा रुग्णवाहिका वापरता येईल.
अशा वाहनाचे भाडे प्रादेशिक परिवहन विभागाने निश्चित केलेल्या दराप्रमाणे संबधित मातांच्या खात्यात ऑनलाईन अदा केले जाईल. त्याकरीता गरोदर मातांनी ‘बुक माय ई-व्हेईकल; या ॲपवर नोंदणी करणे आवश्यक आहे, अशी माहिती जिल्हा स्त्री रुग्णालया च्या अधिक्षिका डॉ. आरती कुलवाल यांनी दिली. प्रसुती व प्रसुती पश्चात ४२ दिवसपर्यंतच्या गरोदर माता व एक वर्षापर्यंतच्या नवजात बालकांना तातडीच्या उपचाराकरीता शासकीय व खाजगी रुग्णवाहिका उपलब्ध करुन देण्यात आली आहे.
या सुविधेचा लाभ घेण्यासाठी मातांना ‘बुक माय ई-व्हेईकल ॲप’ डाऊनलोड करुन नोंदणी करणे आवश्यक आहे. ज्या मातेने खाजगी वाहन किंवा रुग्णवाहिकेचा वापर केला असेल अशा मातांनी वा त्यांच्या जवळच्या नातेवाईकांनी जिल्हा स्त्री रुग्णालयात पोहोचल्यानंतर बँकेचे पासबुक व आधारकार्डची झेरॉक्स प्रत जिल्हा स्त्री रुग्णालयात जमा करावी. त्यानंतर त्यांच्या बँक खात्यामध्ये प्रादेशिक परिवहन विभागाने निश्चित केलेल्या दराप्रमाणे वाहन भाडे ऑन लाईन पद्धतीने जमा करण्यात येईल. शासकीय रुग्णवाहिकेचा वापर झाल्यास लाभ मिळणार नाही.
प्रादेशिक परिवहन विभागाने निश्चित केलेले दर याप्रमाणे : मारूती व्हॅनचे महानगर पालिका क्षेत्रातील दर पाचशे रुपये प्रती एक फेरी २५ कि.मी. पर्यंत, महानगरपालिका क्षेत्र सोडून १ हजार रुपये व जिल्ह्याबाहेर ११ रुपये प्रति कि.मी. प्रमाणे राहिल. टाटा सुमो व मॅटॅडोरचे महानगर पालिका क्षेत्रातील भाडेदर सहाशे रुपये प्रती एक फेरी २५ कि.मी.पर्यंत, महानगर पालिका क्षेत्र सोडून १ हजार ४०० रुपये तर जिल्ह्याबाहेर १२ रुपये प्रती कि.मी. प्रमाणे राहिल. टाटा ४०७ किंवा स्वराज मझदाचे महानगर पालिका क्षेत्रातील भाडेदर सातशे प्रती एक फेरी २५ कि.मी.पर्यंत,महानगर पालिका क्षेत्र सोडून १ हजार ३०० रुपये तर जिल्ह्याबाहेर १३ रूपये प्रती कि.मी.प्रमाणे राहिल.ICUअथवा वातानुकूली त वाहनाचे महानगर पालिका क्षेत्र सोडून व जिल्ह्याबाहेर वातानुकूलीत यंत्रणा बसविली असल्यास नमूद दरात १५ टक्के वाढ देय राहिल. तसेच १०० कि.मी. च्या वर १५ रुपये प्रती कि.मी. प्रमाणे रक्कम संबंधितांच्या खात्या मध्ये ऑनलाईन पद्धतीने रक्कम जमा करण्यात येईल, असे कळविण्यात आले आहे...
0 Comments